ភ្នំពេញ៖ ក្នុងឆ្នាំ២០២៣ កម្ពុជាទទួលចំណូលពីទេសចរអន្តរជាតិចំនួន ៣ ០៨៣ លានដុល្លាអាមេរិក កើនឡើង ១១៧.៩ ភាគរយ បើធៀបនឹងឆ្នាំ២០២២។ នេះបើយោងតាមសូចនាករគន្លឹះទេសចរណ៍ និងស្ថិតិទេសចរណ៍ផ្លូវការដែលបានចាត់តាំង ដែលវិស័យទេសចរណ៍សម្រេចបានឆ្នាំ២០២៣ ចេញនាថ្ងៃទី១៦ ខែកុម្ភៈ ឆ្នាំ២០២៤។

របាយការណ៍បានឱ្យដឹងថា ក្នុងឆ្នាំ២០២៣ កម្ពុជាទទួលបានទេសចរអន្តរជាតិ ៥ ៤៥៣ ២៣នាក់ កើនឡើង ១៣៩.៥ភាគរយ។ ដោយឡែក ទេសចរជាតិមានចំនួន ១៨ ៧៤៣ ៣៧៣នាក់ កើនឡើង ៣៤.៥ភាគរយ បើធៀបនឹងឆ្នាំ២០២២ ខណៈរយៈពេលស្នាក់នៅមធ្យម ៣ថ្ងៃ ២យប់ និងចំណាយមធ្យមនៃទេសចរជាតិម្នាក់ ៥០ ដុល្លាអាមេរិក។

ទន្ទឹមនោះ ទេសចរជាតិចេញក្រៅប្រទេសមានចំនួន ១ ៨១៩ ៥០៤ នាក់ កើនឡើង ៨៧.៥ ភាគរយ ធៀបនឹងឆ្នាំ២០២២។

របាយការណ៍ដដែលបានបង្ហាញថា មូលដ្ឋានអាជីវកម្មទេសចរណ៍មាន ១៣ ៩៦៧ អាជ្ញាប័ណ្ណ ខណៈសេវាកម្មស្នាក់នៅមាន ៨០ ១៤៨ បន្ទប់ ដោយផ្តល់មុខរបរ និងការងារទេសចរណ៍បានចំនួន ៤៥ម៉ឺននាក់។ វិស័យទេសចរណ៍បានរួមចំណែកក្នុងផលិតផលក្នុងស្រុកសរុប (GDP) ប្រមាណ ៧.៥ភាគរយ៕